Nawaqid ul islam | Islam se kharij karne wale umoor

 

NAWAQID UL-ISLAM

Nawaqid jama hai naqiz ka or naqiz ka matlb hai "todne wala, gira dene wala, tabah kar dene wala, barbad kar dene wala or bilkul karab kar dene wala". Al-Islam yani "Islam ko." Wo umoor, wo chizein or baatein jo Islam ko gira dene wali hain, tod dene wali hain, khatam kar dene wali hain or tabah-o-barbad kar dene wali hain. 

Islam 3 chizon ka naam hai:

1. ALLAH ke aage jhuk jana uski tawheed-e-khalis ke sath.

2. ALLAH ke aage jhuk jana uski khalis ita'at ke saath. 

3. Mushrikeen or kuffar se doori ikhtiyar karna.

Har shaks me ye 3 baatein honi chahiye or jo bhi tawheed, sunnat or ita'at ke khilaf ho usse door ho jana ye Islam hai. Ise apna liye to hum musalman hain. Ek khauf hmesha apne andar qayam rakhna chahiye ke hum kahi koi aisi harqat na kar baithe jo hmare islam ko barbad karde.

 

Rasool ALLAH ﷺ ne farmaya,

"Anqareeb aise fitne barpa honge jin me baithne wala khade hone wale se behtar hoga aur khada hone wala unme chalne se behtar hoga aur chalne wala unme daudne wale se behtar hoga, jo door se unki taraf jhaank ke bhi dekhega to wo unki bhi samet lenge. Us waqt jis kisi ko koi panah ki jagah mil jayegi ya bachao ka maqam mil sake wo usme chala jaye."

[Sahih Bukhari: 7081]

Ye fitne insan ke deen ko mood denge. Inki lapet me aake ye tabdili aayegi ke, raat ko soye to momin honge aur subah uthenge to kaafir honge, Subah uthe to kaafir aur raat roye to momin. Apne deen ko bech dega duniya ki mamooli garaz aur fayde ke liye, thode se maal ke liye wo apne deen ko bech dega. Iska matlab ye hai ke kisi aise amaal ka ho jana jo Islam ko todne wala ho yani Islam se kharij karne wala ho.

Shahr bin Hawshab RA se riwayat hai ki maine Umm Salma RA se pucha ki " Aye Ummul Momineen! Rasool ALLAH ﷺ jab aapke pass rehte to konsi dua kiya karte the?

"YA MUQALLIB QULUB THABBIT ALA DEENAK"

"Aye dilon ko ferne wale (ALLAH) mere dil ko tere deen par qayam rakhna."

Fir famane lagin ki maine rasool ALLAH se arz kiya ki aap aksar yahi dua kyun kiya karte hain?

Aap ﷺ ne farmaya: "Aye Umm Salma (RA) ! Koi shaks aisa nahi jiska dil ALLAH ki do ungliyon ke bich me na ho, Wo jisko chahta hai qayam (haq par) rakhta hai aur jisko chata hai tedha kar deta hai.(Isliye humko ye dua mangte rehna chahiye).

[Jamia Tirmizi: Vol 2, 1446]

"Aye hmare rab! Hme hidayat dene ke baad hmare dil tedhe na kar dena." 

[Surah Al-Imran 3: 8]

Dilon ki isteqamat bhot badi neymat hai. ALLAH se dua karte rehna chahiye ke wo hamye hidayat par rakhe. Sirat-e-mustaqim ki hidayat de aur us par qayam rakhe. 

Nwaqid al-Islam ke wo kaun se umoor hain jo islam ko tod dene wale hai, unke baare me janna bhot zaroori hai take hum usse bach ke rahen aur apne musalman bhaiyon ko bhi bataye. Islam ko todne wale aise bhot se umoor hain par ye 10 umoor baki umoor se jude hue hain. 

Allah Ta'ala ki ibadat me shirk karna

Koi bhi shirk ho deen se kharij karne wala hai, fir wo Rubobiyah me ho, Uloohiyah me ho ya Asma Wa Siffat me. ALLAH Ta'ala QURAN me farmata hai,

"Yaqeenan ALLAH Ta'ala apne saath shirk kiye jaane ko nahi bakhshta, aur uske siwa jise chahe bakhsh de, aur jo ALLAH Ta'ala ke saath shareek muqarrar kare usne bahut bada gunaah aur bohtan bandha."

[Surah Nisa 4: 48]

ALLAH ne shirk ke khatre ko wazah taur par irshad kiya ke, woh use maaf nahi karta hai jo uske saath kisi ko sharik banata hai. Wo dusre gunahon ko maaf karta hai. Lekin jo shirk par mar jaye use maaf nahi karega. Mushrik ko qiyamat ke din ALLAH ki maghfirat ka koi mauqa nahi milega. Wo jahannam ki aag ka indhan hoga. 

Shirk ki do qismein hain-

i. Shirk-e-Akbar- Koi bhi ibadat jo gairullah ki taraf mod de Shirk-e-Akbar hai.

ii. Shirk-e-Asgar- Aisi gunah jo Shirk-e-Akbar tak pahuncha de. jaise gairullah ki qasam khana. gairullah ki  qasam khane se banda kafir nahi hota magar uske amaal tabah ho sakte hain.

Hazrat Ali رضي الله عنه se rivayat hai,

Nabi-e-Kareem ﷺ ne farmaya,

"Jo shaks apne walid par laanat kare uspar ALLAH ki laanat hai aur jo shaks gairullah ke naam par zabah kare uspar ALLAH ki laanat kare aur jis shaks ne zameen (ki had bandi) nishan badla us par ALLAH laanat kare."

[Sahih Muslim: 5124]

Agar ham shirk ka irtekab karte hai to hmari sari nekiyan barbad ho jati hai. Agar hamse shirk ho jaye to hmare sare aamal zaya ho jate hain yaha tak ki agar hmare pass pahad ke barabar neki ho to wo bhi bekar hai.

Nabi-e-Kareem ﷺ ne farmaya,

"ALLAH ka haq uske bandon par ye hai ke uski ibadat kare aur uske saath kisiko sharik na thehraye aur bandon ka ALLAH ta'ala par ye hai ke jo banda ALLAH ke sath kisiko sharik na thehrata ho ALLAH use azab na de."

[Sahih Bukhari: 2856]

Apne aur Allah ke darmiyaan Ghairullah ko waasta banana

ALLAH aur apne darmiyan wasta bana. Iski do suratein hai-

i. Jisko wasta banaya usko pukarna taake ALLAH ka qurb hasil kiya ja sake.

ii. ALLAH ko pukarna magar unke waste se. Ye shirk nahi balke biad'at hai.

Makka ke kafir apne maboodon ke baare me kaha karte the :

"Yaani in buton ki ibadat ham sirf isliye karte hain kyunki ye ALLAH ke paas hamare sifarishi hain."
[Surah yunus 10:18]

Makka me 360 but the aur ye but ALLAH ke nek bandon ke the. Makka ke mushrikon ka ALLAH pe imaan tha lekin wo kehte the ham in buton ki ibadat sirf is liye kate hain ke wo hame ALLAH ke kareeb kar denge.

"Ham inki ibadat sirf is liye karte hain ke ye hame ALLAH ke qareeb kardein."
[Surah Az-Zumar 39: 3]

Gairullah ki ibadat karne wale isi baat ka irtekab karte hai. Unka manna hai ke ALLAH hamse bhot door hai ye hmari shifaris ALLAH se karenge par unhe ye maalom hona chahiye ke ALLAH hmari rag-o-jaan se bhi zyadah qareeb hai.

Hazrat Abu Hurairah r.a. se riwayat hai, unhone arz kiya : Ya Rasool ALLAH ﷺ! Qayamat ke din Aapki sifarish se koun zyada hissa paayega ?

To Aap ﷺ farmaya : "Abu Hurairah ! Mujhe yaqeen tha ke tujhse pahle koi mujhse yeh baat nahi poochega, kyunki Mai dekhta hun ke tujhe hadees ki badi hirs hai. Qayamat ke din meri shafa’at se sabse zyada behrawar wo shakhs hoga jisne apne dil ya khuloos niyat se ﻵ ﺍِﻟَﻪَ ﺍِﻟّﺎ ﺍﻟﻠّﻪُ kaha hoga."

[Sahih Bukhari: 99]

Kaho ke: "Sifarish to sari ke sari ALLAH ke hi ikhtiyar me hai. Usike qabze me asmaan aur zameen ki badshahat hai, phir usi ki taraf tumhe lautaya jayega."

[Surah Az-Zumar 39: 44]

ALLAH ke siwa koi is layak nahi jo hamari zaruraton ko puri kar sake. Ye baat ALLAH ke ikhtiyar me hai wo jise chahe shifaris ki ijazat de aur jise chahe na de. Aur jiskr haq me chahe kisiko shifaris karne de aur jiske haq me na chahe na karne de.  

Nabi-e-Kareem ﷺ ne farmaya,

"Dua ibadat hai."

[Abu Dawood: 1479

Waste se dua karna ya waste wale ko pukarna, ek shirk hai dusra bid'at hai. Rasool ALLAH ﷺ ki parvi hai ALLAH ki paivi hai jo hame shirk aur bid'ad dono se mehfooz karta hai.

Mushrikeen ko kafir na samajhna, Uske kufr me shaq karna ya Unke mazhab ko sahih qarar dena

Isme teen baatein hain:
i. Mushrikeen ko kafir qarar na dena jab ke ALLAH ne saaf taur par unhe kafir kaha hai.
ii. Unke kufr me shaq karne. zuban se kehna ke ye kafir hain par dil me shak hona ke pata nahi ye hain ya nhi.
iii. Unke mazhab ko sahi karar dena.

Ye tino chizeizein bande ko kafir bana deti hai. mushrikeen ko ALLAH ne kafir kaha hai jaise nasara ,yahoodi, mushrikeen-e-makkah unke kufr ka ALLAH neailaan kiya hai.

Wo log yaqeenan kafir ho chuke hain jinhone ye kaha hai ke: "ALLAH teen me se tisra hai, halanke ek khuda ke siwa koi khuda nahi hai. Aur agar ye log apni is baat se baaz na aye to inme se jin logon ne kufr ka irtikab kiya hai, unko dardnaak azab pakad kar rahega."
[surah maida 5: 73]

Isaiyon ka ek giroh ka aqiadah tha ke Isa maseeh ALLAH hain. Dusre giroh ka aqidah ye hai ke teen ke jama hone se ek ALLAH banta hai. pehla ALLAH, dusra Hazrat Isa AS aur tisra hazrat Zibreel. ALLAH ne farmaya Jinka ye aqeedah hai wo log bhi kafir hai. ALLAH jinhe kafir kahe unko ham kafir na samjhe ya unke kufr me shak kare yaqeenan jo unko kafir qarar nahi deta wo khud kafir hai.

Rasool Allah ﷺ ke tarike se kisi gair ke tarike ko zyada pasand karna ya kisi gair ke huqam ko Rasool Allah ﷺ ke huqam se zyada behtar janna

Is baat ka aqeedah rakhna ke Nabi-e-Kareem ﷺ se doosron ka taur tareeqa zyada behtar hai ya ye ke Aap ﷺ ke faislon aur ahkaam se ghair ke faisle aur ahkaam afzal hain. Misaal ke taur par tawagheet(Taghoot har wo cheez hai jiski ALLAH ke siwa ibadat ki ja rahi ho) ke faislon ko Aap ﷺ ke faislon par tarjeeh dena. Jisne ye aqeedah rakha wo kafir ho gaya.

"(Hamd wa salaat) ke baad bilasuba behtareen hadees (kalaam) ALLAH ki kitaab hai aur zindagi ka behtareen tariqa Muhammad ﷺ ka tareeqa zindagi hai."

[Sahih Muslim: 867]

Sabse behtareen kitaab QURAN hai aur sabse behtareen zindagi jine ka tariqa  Nabi-e-Kareem ﷺ ka hai jis par hame amal karna chahiye. Aap ﷺ ki sunnat, apki hidayat har makaam ke liye hai, har daur ke liye hai. Sabe behtareen tariqa  Nabi-e-Kareem ﷺ ka hai aur sabse badtareen tariqa wo hai jo unke tariqe se hat ke ya nai cheez ho.

"Aur isse tarha hamne tumhare pass apne hukum se ek rooh bataur wahi nazil ki hai. Tumhe isse pehle na ye maloom tha ke kitab kya hoti hai aur imaan kya hai, lekin hamne is QURAN ko ek noor banaya hai jiske zariye ham apne bandon me se jisko chahte hain hidayat dete hai aur isme koi shaq nahi ke tum logon ko wo sidha rasta dikha rahe hon."

[Soorah Ash-Shura 42:52]

Kisi bhi tarha se kisi ghair ke tariqe ya kanoon ko Nabi-e-Kareem ﷺ ke tariqe aur unke kanoon se tarjeeh dene wala, islam ke tariqe aur  Nabi-e-Kareem ﷺ ke kanoon se tarjeeh dene wala aur fazlat dene wala ya usko zyada akmal aur kamil manne wala kufr ka murtakib hai.

Jo shaks us cheez se bugaz rakhe jo Rasool Allah ﷺ Allah ta'ala ki taraf se laaye hain

Jo shaks us chiz se bugaz rakhe jo Rasool ALLAH ﷺ ALLAH ta'ala ki taraf se laaye hain wo akidah ho, amal ho, ibadaat ho, nizam-e-tijarat ho ya shadi ke moamlaat ho ya kharid-o-farokhat ke umoor ho ALLAH ke pagambar jo kuch bhi laye usme se kisi bhi cheez se apke dil me bugaz ya napasandidagi hai. Qubool to kar rahe hai magar napasandidagi ke sath, bugaz ke sath, nafrat ke sath to ye bhi kufr hai. Ulma ka ittefak hai ke Aisa insan bhi kafir ho jata hai jo Nabi-e-kareem ﷺ ki shariyat me se kisi amar ke sath bugaz rakhe. ALLAH Ta'ala ka irshaad hai.

"Yeh isliye ke woh ALLAH ki nazil kardah cheez se nakhush huye pus ALLAH Ta'ala ne ( bhi ) unke amaal zaya kar diye."
[Surat Muhammad 47: 9]

Nabi-e-Kareem ﷺ ki laai hui shari'at Ke kisi bhi hukm se bughz ya adawat rakhne wala kaafir hai. Agarche wo zahiri taur par deen pe amal karne wala hi kyun na ho. Wo log momin nahi ho sakte jab tak wo ikhtelaf me Nabi-e-Kareem ﷺ ki paivi na kare.

Rasool Allah ﷺ ke deen se sabit karda chizon ka mazaak udana

JO shaks kisi chiz ka mazak udaye jo Nabi-e-kareem ﷺ ke deen se koi bhi chiz sabit ho aur koi shaks uska mazak udaye, ya kisi amar par ALLAH ka sawab uska mazak udaye ya kisi amal par ALLAH ka azaab uska mazak udaye wo shaks kafir ho jayega. 
Aap ﷺ ki shari'at ke kisi hukm ya kisi sawaab ya iqaab (azaab) ka mazaaq udana kufr hai.

"Aap Keh dijiye ke ALLAH uski aayatein aur uska Rasool hi tumhare hansi mazaq ke liye reh gaye hain?"
"Tum bahaane na banao, yaqeenan tum apne imaan ke baad kafir ho gaye ho."
[Surah Taubah 9: 65-66]

Mushrikeen Ahle imaan ko milte to kehte hum momin hai aur kuffar se milte to kehte haim to unse mazak karte hai. Is mazal ka sila unko qayamat ke din milega. Unke mazak udana kufr hai. Jo shaks sariyat ka mazak udayega yaqeenan kafir ho jayega. Jo ALLAH ki ayat ke sath uske rasool ke sath jo tum mazak karte ho isi se tum kafir ho chuke ho.

Jadoo

Jaado ki besumar qismein hai magar iski 2 qismein moashre me mashoor hain. 

i. Tafreeq ka jadu- Is qism ke jadu me dilon ko fetna, tafreeq paida karna, ranjish paida karna miya biwi ke darmiyan, bhai bhai ke darmiyan, baap bete ke darmiyan, doston ke darmiyan. Ye amal badi kasrat se ho raha hai. takreeban har tisra chautha ghar is fitne ka shikar hai chunki ye amal kasrat se ho raha hai isliye ye bhi badtareen amal hai. jo ise karata hai wo bhi kafir aur jo karta hai wo bhi kafir. 

Jadoo sikhna ye bhi kufr hai, sikhana ye bhi kufr hai. Jadu agar ho jaye to jadu ko tudwana jadu ke zariye todwana bhi kufr hai.

Rasool ALLAH ﷺ par jadu hua to do suratein nazil hui Surah Falak aur Surah Naas aap ﷺ ne ye suratein padhi jisse unka jadu khatam ho gaya.

 

ii. Mohabbat ka jadu- Is tarha ka jadu andhi Mohabbat paida karna ke liye kiya jata hai. Is amal ke zariye bade bhayanak juraim ho rahe hai aur ke qaum tabahi, zalalat ke dahane par khadi hai. Jadu kufr hai apni tamam suraton ke sath. Jisne jadu kiya ya jadu par raazi hua usne kufr kiya. Irshaad e Bari Ta'ala hai.

"Ham (Haroot aur maroot) mehaz azmaaish ke liye (bheje gaye) hai, lihaza (jadu ke piche lag kar) kuft ikhtiyar na karo."

[Surah Baqara 2: 102]

Hazrat Sulayman عَلَيْهِ ٱلسَّلَامُ ka daur tha aur unho ne aisi badshahat mangi jo kisiko na di ho to ALLAH ne jinno,charindo, parindo par unki huqumat dedi. Jadugar jo amal karte hai wo jinno (khabis jin, shyateen) ke zariye sare amal karate hai. Hazrat Sulayman عَلَيْهِ ٱلسَّلَامُ ki huqumat jinno par thi, wo unke Nabi the, unke badshah thi, yaha shahar (jadu) ka koi talluq nahi. Agar jinn aapki khidmat karte the to sirf apke Nabi hone ki wajah se. Hazrat Sulayman عَلَيْهِ ٱلسَّلَامُ ke intqal ke baad Bani Israil ne ye baat aam kardi ke aap jadu karte the. ALLAH ne do farishton ko bheja unki azmaish ke liye aur jo taleem lene aata unko ye kehte "Ham (Haroot aur maroot) mehaz azmaaish, ke liye (bheje gaye) hai, lihaza (jadu ke piche lag kar) kuft ikhtiyar na karo." Iska maytlb ye hai ke jadu karna aur karana dono kufr hai. Jo bhi kisi kaam me jadu ka sahara leta hai usne kufr ka irtekab kiya.

Musalman ke khilaf Mushrikeen ko mazboot karna ya unki madad karna

Mushrikeen ki madad karna unko majboot karna, unke sath dosti karna yani musalmano ke khilaf unki madad karna ye bhi kufr hai. ALLAH ka farman hai:

"Aye imaan walo! Tum yahood-o-nasaara ko dost na banao ye to aapas me hi ek doosre ke dost hain. Tum me se jo bhi inme se kissi se dosti kare woh be-shak enhi mein se hai zalimon ko Allah Taalaa hargiz raah-e-raast nahi dikhata."
[Surah Al-Ma'idah 5:51]

Dosti me bade bade kaam ho jate hain ya karne pad jate hain. Aise log jo unse dosti karte hai wo unhi me se ho jata hai. Unki soch, unki samajh unke hisab se ho jati hai wo unki paivi karne lag jate hai. MIsaal ke taur par unki dosti me unko aslah bana ke de to wo kafir us aslah ko musalmano ke khilaf istemal karega to ye kufr hai aisa banda kafir ho jata hai jo musalman ke khilaf kisi ki madad karta hai.

"Aye wo logon jo imaan laye ho mere aur khud apne dushmano ko apna dost na banao. Tum to dosti se unki taraf paigam bhejte ho."

[Surah Al-Mumtahinah 60:1]

Jab Quraish ne sulah hudaibiya ka moohaydah toda to Rasool ALLAH ﷺ ne makka pe chadhai ki tayyari shuru kar di, magar kuch sahabi ke siwa kisiko kisiki ko na bataya ke aap ﷺ kis muhim par jana chahte hain. magar ek muslim ne is baat ki khabar ek aurat ke zariya mushrikeen ne tak pahunchani chahi magar wo kamyab na ho saka.

Rasool Allah ﷺ ke deen se nikal jane ki gunjaish ka akidah rakhne wala kafir hai

Jiska aqeedah ho ke baaz insaanon ke liye shari'at e Mohammadiya ki pabandi zaruri nahi hai wo kaafir hai. Hazrat Musa عَلَيْهِ ٱلسَّلَامُ ke daur me Hazrat Khizar عَلَيْهِ ٱلسَّلَامُ Hazrat Musa عَلَيْهِ ٱلسَّلَامُ ki shariyat se bahar the. To jaise unke liye khurooj mumkin tha aur jayaz tha wese ALLAH ke Nabi ﷺ ki sariyat se khurooj mumkin hai aur jayaz hai, agar kisiki ye soch hai to wo kafir hai. Rasool ALLAH ﷺ ALLAH ke akhiri nabi hai. Aap tamam logon ke rasool hain. Agar koi ye dawa karta hai ke ALLAH ke nabi ki sariyat se khurooj mumkin hai to ye akidah kufr hai. ALLAH ne farmaya,

"Jo shakhs Islam ke siwa aur deen talash kare uska deen qubool na kiya jayega aur woh aakhirat mei nuqsan pane walon me hoga."
[Surah Al-Imran 3:85]

Jis bhi shaks ne kisi aur deen ki talash ki ya dawa kare ke mere liye ya falan ke liye ALLAH ke nabi ki shariyat se khurooj mumkin, jayaz hai ya koi gunjaish hai to ye akidah kufr hai.

"Aye paigambar! hamne tumhe sare jahano ke liye rehmat hi rehmat bana ke bheja hai."

[Surah Al-Anbiya 21:107]

"Aap keh dijiye! Aye logon mai tum sabki taraf us ALLAH ka bheja hua hoon."

[Surah Al-A'raf 7:158]

ALLAH ne Nabi-e-kareem ko ye hidayat ata farmai ke woh Bani Israil samet tamam insano ko apni nabuwat par imaan laane aur apni itteba ka dawat de.

Deen-e-Islam se mukammal inheraaf kar lena

Deen-e-Islam se mukammal inheraaf, na uska ilm hasil kare aur na hi uspar amal kare. Na deen sikhne ka khayal na amal ka kayal, deen se gaitalluk ikhtiyar kar lena bhi kufr hai. ALLAH Ta'ala ka Irshaad hai,

"Usse badh kar zalim kaun hai jisse ALLAH Ta'ala ki aayaton se wa'az kiya gaya phir bhi usne unse mun pher liya (yaqeen mano) ke hum bhi gunehgaron se intiqam lene wale hain."
[Surah As-Sajdah 32:22]

Us shaks se bada zalim kon ho sakta hai jise ALLAH ki aayaton ke sath nasihat ki jaye aur wo airaz karde. Mana ALLAH ki aayton aur uske deen se airaaz karne wala sabse bada zalim hai. Jo log muslim gharane me hai, muslim moashare me hai magar deen se koi talluk nahi hai, na koi ragbat hai, na koi khwaish hai, na im hasil karne ki koi shawk hai, na koi amal ki khwaish hai bilkul be talluki is tarha ke log bhi hmare moashare me maujood hain.

In nawaqis ko inki sangeeni aur unke aam hone ki wajah se zikr kiya gaya hai, isliye har musalman ki zimmedari hai ki In nawaqis se bache aur khauf khaaye, hame ghazab-e-ilaahi nez uske asbaab aur azaab ki sakhti se ALLAH ki panah mangte rehna chahiye. 

i. Nawaqid ul islam pehli qism se bachne ke liye hame khalis ALLAH me yakeen rakhna chahiye uske sath kisiko makhlook kara nahi dena chahiye.

ii. Nawaqid ul islam ki dusri qism se bachne ke liye hame chahiye ke ham sirf aur sirf ALLAH ki madad mange, sirf usse hi apni khwaishat ka izhar kare.

iii. Nawaqid ul islam ki tisri qism se bachne ke liye hame chahiye ke apne deen ko behtar jane aur jinhe ALLAH ne kafir kaha hai unhe kafir jane, kisi bhi tarha musalman ke khilaf unki madad na kare aur na unke deen ko behtar jane.

iv. Nawaqid ul islam ki chauthi qism se bachne ke liye hame chahiye ke  ham Nabi-e-kareem SAW ki tarike par amal kare, unki pairvi karein.

v. Nawaqid ul islam ki panchvi qism se bachne ke liye hame chahiye ke ham har us chiz se dili mohabbat rakhe jo Nabi-e-Kareem SAw le kar aaye hai.

vi. Nawaqid ul islam ki chati qism se bachne ke liye hame chahiye ke Nabi-e-Kareem SAW ki sariyat ka kisi hukm ya kisi sawaab ya azaab ka mazak na udaye balke har us chiz ko apne haq me behtar jaane.

vii. Nawaqid ul islam ki satvi qism se bachne ke liye hame chahiye ke na jadu se door rahe, na ispar amal kare na karwaye. Har haal me ALLAH se madad talab kare na ke shayateen se.

viii. Nawaqid ul islam ki aathvi qism se bachne ke liye hame chahiye ke ham un mushrikon aur kafiron se doori ikhtiyar karke rakhte jo musalmano ke dushman hain.

ix. Nawaqid ul islam ki navi qism se bachne ke liye hame chahiye ke sirf apne deen par amal kare aur apne deen ko behtar jaane.

x. Nawaqid ul islam ki dasvi qism se bachne ke liye hame chahiye ke hame deen ka ilm hasil karne par zoor dena chahiye, im hasil karne ki khwaish dil me paida karni chahiye aur uspar amal karna chahiye.

ALLAH Ta'ala se dua hai ke ham sab ko achhe kaamon ki taufeeq de aur hame aur tamaam musalmano ko siraate mustaqeem ki hidayat farmaye, wo bahut hi qareeb aur sunne wala hai.